මේ වනවිට දැඩිලෙස කඩාවැටී ඇති ආර්ථිකය යළි ගොඩනැංවීමේ වගකීම හිටපු මුදල් අමාත්‍ය රවී කරුණානායක මහතා වෙත ලබාදෙන ලෙස ජනාධිපති රනිල් වික්‍රමසිංහ වෙත එක්සත් ජාතික පක්ෂ ක්‍රියාකාරීන් ඇතුලු පිරිස් කිහිපයකින්ම ඉල්ලීම් රැසක් ලැබී ඇති බව වාර්තා වනවා.

අර්බුදයක් අවස්ථාවකදී ආර්ථිකය කළමනාකරණය කිරීම සම්බන්ධයෙන් රවී කරුණානායකට වසර ගණනාවක අත්දැකීම් තිබෙන බවත්, එහෙයින් ආර්ථිකය ගොඩනැංවීම සඳහා ඊටත් වඩා සුදුසු පුද්ගලයෙකු නොමැති බවත් එජාප ක්‍රියාකාරීන් ජනාධිපතිවරයාට පෙන්වා දී තිබෙනවා.

යහපාලන ආණ්ඩුවේ මුල් භාගයේදී මුදල් ඇමතිවරයා ලෙස කටයුතු කළ රවී කරුණානායක මහතා ඉන්ධන මිල පහත දැමීම, රාජ්‍ය සේවකයන්ගේ වැටුප් විශාල ප්‍රමාණයකින් එකවර ඉහළ දැමීම ඇතුළු සහන රැසක් ලබාදුන් අතර වර්තමානයේදී දැඩි දුෂ්කරතා අත්විඳිමින් සිටින ජනතාවට සහන සැළසීමට කරුණානායක මහතාට හැකිවනු ඇති බවද එජාප ක්‍රියාකාරීන් පවසා තිබෙනවා.

2016 වසරේ මාර්තු මස 31 වනදා ශ්‍රී ලංකා මහ බැංකුව විසින් සිදුකළ බැඳුම්කර වෙන්දේසියක දී රුපියල් බිලියන 15 ක බැඳුම්කර සම්බන්ධයෙන් සාපරාධී විශ්වාසය කඩ කළේ යැයි චෝදනා කරමින් ගොනු කර ඇති චෝදනා 22 ක් අතුරින් චෝදනා 11කින් හිටපු මුදල් අමාත්‍ය රවි කරුණානායක ඇතුළු විත්තිකරුවන් දස දෙනෙකු නිදහස් කරන ලෙස කොළඹ ත්‍රිපුද්ගල මහාධිකරණ විනිසුරු මඩුල්ල පසුගිය දෙසැම්බර් 6වැනිදා නියම කළා.

Leave a Reply

Your email address will not be published.